Европскиот суд за човекови права по 12 години едногласно одлучи дека Инсајдер, кој тогаш беше прикажан на телевизијата Б92, не ги прекршил правилата на професијата известувајќи за злоупотреби при набавка на вакцини против свински грип, објави Инсајдер.

Како што стои во одлуката на Европскиот суд, судовите ја загрозиле слободата на говорот и медиумското известување во интерес на јавноста со пресудите против тогашната ТВ Б92.

Во серијата „Купување и продавање здравје“ на „Инсајдер“ од 2011 година, беше откриено дека вакцината против свинскиот грип дошла во Србија преку три посредници и дека поради тоа е платена повеќе отколку во другите земји.

Случајот кој стигна до Европскиот суд за човекови права се однесува на полицискиот извештај до кој дошле новинарите на „Инсајдер“ во кој се гледа дека полицијата осомничила 14 лица за злоупотреби при набавката на вакцините, но на крајот само три лица биле уапсени.

Објавени имињата на исчезнатите од списокот на осомничени, а меѓу нив беше и помошник министерката за здравство Зорица Павловиќ, која го тужеше и Б92.

Домашните судови пресудиле во нејзина корист, односно дека со ова известување е нарушен нејзиниот углед, а сега, 12 години подоцна, Европскиот суд одлучи спротивно – во корист на Б92 и известувањето на новинарите на Инсајдер.

Европскиот суд наведува дека домашните судови го прекршиле членот 10 од Европската конвенција за човекови права, кој ја гарантира слободата на известување.

„Судот утврди дека српските судови признале дека информациите објавени од апликантот придонеле за јавната расправа и дека некој што ја извршува функцијата помошник министер за здравство требало да покаже поголем степен на толеранција“, наведува Европскиот суд.

Европскиот суд наведува дека и домашните судови заклучиле дека известувањето на новинарите придонело за дебатата која е од јавен интерес.