Владејачката проевропска граѓанска платформа на премиерот Доналд Туск освои 38,2 отсто од гласовите на европските избори во Полска, пред конзервативната Право и правда (ПиС) со 33,9 отсто.

Граѓанската платформа, членка на Европската народна партија (ЕПП), освои 38,2 отсто од гласовите и на тој начин го постигна приближно истиот резултат како и во 2019 година.

„Полска покажа дека овде победуваат демократијата, чесноста и Европа. Десет години го чекаме ова прво место, многу сум среќен“, рече Туск.

На второ место со 33,9 отсто гласови е опозициската конзервативна партија ПиС, која значително го влоши резултатот од пред пет години, кога доби нешто повеќе од 45 отсто од гласовите и 25 мандати. Сега ќе ги има 19.

Со 53 места во Европскиот парламент, Полска е на петтото место меѓу членките на ЕУ по бројот на места – по Германија, Франција, Италија и Шпанија.