Жозе Мурињо, еден од најтрофејните тренери во историјата, е многу блиску до преземање на Бешикташ. Ова го пишуваат турските медиуми, а го потврди и претседателот на клубот од Истанбул.

„Го контактиравме Мурињо. Тој е подготвен да дојде во нашиот клуб. Договоривме нов состанок следната недела во Италија. Финансиските детали од договорот се решени”, изјави Хусеин Јуџел, претседател на Бешикташ.

Мурињо неодамна беше поврзуван со Фенербахче, но Бешикташ очигледно е далеку поконкретен. Тој клуб и оваа сезона ги разочара своите навивачи, далеку е зад најголемите ривали Галатасарај и Фенербахче.

Доколку дојде Мурињо ќе треба да се вмеша во борбата за титулаѕа, која последен пат Бешикташ ја освои пред три години.

Славниот Португалец е без работа од јануари кога доби отказ од Рома поради лошите резултати.