Владите на осум земји-членки на Европската унија денеска соопштија дека е потребна преоценка на ситуацијата во Сирија, за да се овозможи доброволно враќање на сириските бегалци во нивната татковина.

Во заедничката декларација, официјални лица од Австрија, Чешка, Кипар, Данска, Грција, Италија, Малта и Полска рекоа дека се согласиле за повторна проценка што ќе доведе до „поефективни начини за справување“ со сириските бегалци кои се обидуваат да стигнат до земјите на Европската унија , бидејќи ситуацијата во Сирија „значително се промени, иако не е постигната целосна политичка стабилност“, пренесува АП.

Во декларацијата се наведува дека ЕУ треба дополнително да ја зголеми својата поддршка за Либан со цел „да се намали ризикот од уште поголем прилив на мигранти од Либан во ЕУ“, откако претходно овој месец ЕУ објави пакет помош за Либан во вредност од околу една милијарда евра со цел зајакнување на граничните контроли за да се запре приливот на баратели на азил и мигранти кон Кипар и Италија.