Директорот на Светската здравствена организација (СЗО) Тедрос Аданом Гебрејесус денеска изјави дека децата умираат од глад во северниот дел на Газа и дека овие „мрачни наоди“ дошле по посетата на претставниците на агенцијата на ОН на болниците Ал-Авда и Камал Адван за време на викендот.

Тој на социјалните мрежи напиша дека недостигот на храна резултирал со смрт на десет деца и „тешки нивоа на неухранетост“, додека болнички згради биле уништени, јавува Би-би-си.

Според него, СЗО успеала да испорача 9.500 литри гориво во секоја болница, како и некои неопходни медицински материјали, но дека тоа е „дел од итните потреби за спасување животи“, пренесува Танјуг.

Тедрос рече дека СЗО апелира до Израел да се погрижи, хуманитарната помош да се доставува безбедно и редовно.

„На цивилите, особено на децата и медицинскиот персонал, итно им е потребна поголема помош. Но, клучниот лек што им е потребен на сите овие пациенти е мирот. Прекин на огнот“, нагласи Тедрос на платформата „Икс“. Министерството за здравство во Газа, кое го води Хамас, во неделата извести дека најмалку 15 деца починале од неухранетост и дехидрација во болницата Камал Адван, јавува Би-Би-Си.