Најмалку тројца работници загинаа, а тројца се хоспитализирани со тешки повреди во несреќа на градилиште на супермаркет во Фиренца, соопштија денеска локалните власти, предупредувајќи дека бројот на жртвите може да биде поголем.

Пожарникарите соопштија дека несреќата се случила во северозападниот дел на градот, а причина е уривање на плоча на монтажен објект.

„Тројца работници се потврдени мртви, уште двајца се водат за исчезнати“, рече Мониа Мони, службеник за цивилна заштита во Тоскана, регионот што ја опфаќа Фиренца.

Таа рече дека во моментот на несреќата на градилиштето имало осум лица. Од тројцата хоспитализирани работници, двајца се во тешка состојба, но нивните животи не се во опасност, додаде таа.

Претходно, Еугенио Џани, претседател на регионот Тоскана, изјави за „СкајТг24“ дека има многу мали шанси да се најдат повеќе преживеани под урнатините.