Германскиот канцелар Олаф Шолц во Вашингтон го повика американскиот Конгрес да ја деблокира финансиската помош за Украина.

„Би било добро помошта да биде достапна многу брзо, бидејќи без придонесот на САД, ситуацијата во Украина би била многу, многу комплицирана“, изјави Шолц за новинарите пред средбата во Белата куќа со претседателот Џозеф Бајден.

Шолц ја нагласува итноста за зголемување на воената помош за Украина, во услови на конфликт околу гласањето за новиот пакет помош за Украина во Конгресот.

„На Украина и е потребна сета наша поддршка за да може да се одбрани од руската агресија“, рече Солц.

Посетата на Шолц, трета откако ја презеде функцијата во декември 2021 година, доаѓа во време кога Бајден води кампања за втор претседателски мандат, а Конгресот со месеци преговараше за договор кој вклучува околу 60 милијарди долари воена помош за Украина.

Деблокирањето на помошта е неизвесно бидејќи некои претставници на Конгресот блиски до поранешниот републикански претседател Доналд Трамп одбиваат да ја одобрат помошта.

Европската унија неодамна објави дека ќе деблокира 50 милијарди евра помош за помош на Украина до 2027 година.

Според германски извори, Шолц и Бајден ќе разговараат и за стравувањата од разгорување на конфликтот на Блискиот исток по четиримесечната војна меѓу Израел и Хамас.