Генералниот секретар на ОН Антонио Гутереш изјави во неделата дека Блискиот Исток е на „работ на бездната“ и го повика исламистичкиот Хамас веднаш да ги ослободи заложниците, а Израел да обезбеди итен хуманитарен пристап до Појасот Газа.

„Секој од овие цели вреди сам по себе“, се вели во соопштението на Гутереш. „Тие не треба да станат договор за пазарење и мора да се случат затоа што тоа е вистинската работа“. „Газа останува без вода, електрична енергија и други основни резерви“, рече шефот на ОН.

Гутереш рече дека ОН имаат залихи на храна, вода, непрехранбени производи, медицински материјали и гориво во Египет, Јордан, Израел и на Западниот Брег, кои би можеле да бидат испратени во Газа „во рок од неколку часа“, доколку можат безбедно и без пречки да се испорачаат.

По големиот напад на Хамас, Израел го поврза обезбедувањето основни услуги за цивилното население во Појасот Газа со ослободувањето на израелските заложници кои ги држи исламистичката организација. Повиците на Израел до жителите на Газа да ја напуштат областа беа широко критикувани, вклучително и од ОН, кои предупредија на „хуманитарна катастрофа“. „Хуманитарна катастрофа без преседан“ е во тек во Газа, соопшти агенцијата на ОН за палестински бегалци.

„Ниту капка вода, ниту зрно пченица, ниту литар гориво не е дозволено да влезе во Газа во последните осум дена“, рече Филип Лазарини, шеф на агенцијата на ОН за палестински бегалци.