Eгипетскиот претседател Абдел Фатах ал Сиси повика да се обезбеди хуманитарна помош за Палестинците во Појасот Газа и рече дека Египет се’ уште се обидува да спречи понатамошна ескалација што може да го дестабилизира регионот.

Масовното израелско бомбардирање и целосната опсада на Газа предизвика тревога во Египет, кој ја дели границата со јужната палестинска енклава и ја контролира главната излезна точка за 2,3 милиони жители кои живеат таму.

Египет рече дека сака да ја олесни испораката на помош преку преминот Рафах, но исто така сигнализираше дека одбива да ги турка жителите на Газа на југ преку границата.

Во телефонски разговор со британскиот премиер Риши Сунак, египетскиот претседател „ја истакна потребата да се гарантира регуларноста на хуманитарните услуги и помошта за палестинскиот народ во Појасот Газа“, соопшти кабинетот на Сиси.

Сиси го информирал Сунак и за „постојаните напори на Египет да се залага за смиреност и екстремна воздржаност за да се спречи понатамошно крвопролевање, чија цена ќе ја платат уште повеќе невини луѓе, а последиците од кои ќе се прошират низ целиот регион“, се вели во соопштението.

Израел, кој се одмаздува на смртоносниот упад во Израел од страна на вооружени лица на Хамас, во четвртокот рече дека нема да има хуманитарен крај на опсадата на Газа додека не се ослободат сите нивни заложници.