Преговарачите на големите холивудски студија и на истакнати филмски и телевизиски писатели планираат повторно да се сретнат во петок (22 септември), се наведува во соопштението на Здружението на писатели на Америка (WGA).

Двете страни во четвртокот преговараа повеќе од 10 часа, но не успеаја да постигнат договор за ставање крај на повеќемесечниот ќорсокак околу хонорарите и употребата на вештачка интелигенција, објави Си-ен-ен.

Алијансата на филмски и телевизиски продуценти, која преговара во име на холивудските компании и студија, не одговори веднаш на барањето за коментар.

Околу 11.500 членови на Здружението на сценаристи ја напуштија работата во мај, лути од тоа како се променија работните услови во ерата на стриминг-телевизија.

Со цел да помогнат да се постигне договор, на преговорите во средата и четвртокот беа присутни и извршниот директор на „Волт Дизни“ Боб Ајгер, вториот извршен директор на „Нетфликс“ Тед Сарандос, претседателката на „Ен-би-си Јуниверзал стидио груп“ Дона Ленгли и извршниот директор на „Ворнер Брос дискавери“ Дејвид Заслав, според извор близок до студијата.