Американците нема да се двоумат да воведат дополнителни санкции за Русија и Северна Кореја доколку склучат какви било нови договори за оружје, објави американскиот Стејт департмент.

Портпаролот на Министерството Метју Милер го издаде предупредувањето на брифинг како одговор на прашањата за средбата во Русија меѓу Владимир Путин и Ким Џонг-ун.

„Веќе презедовме голем број активности за да ги санкционираме субјектите кои посредуваа за продажба на оружје меѓу Северна Кореја и Русија и нема да се двоумиме да воведеме дополнителни санкции доколку е потребно“, рече Милер.

Тој нагласи дека е загрижувачки што Русија и Северна Кореја разговараат за зголемена соработка што може да ги прекрши резолуциите на Советот за безбедност на ОН.