Тинејџерката Коко Гоф ја декласираше поранешната гренд слем шампионка Јелена Остапенко со 6:0/6:2 за пласман во полуфиналето на САД опен на голема жештина на „Артур Еш“ стадионот во Њујорк.

19-годишната Гоф ја заврши работата за нешто повеќе од еден час, освојувајќи седум гема во низа и очигледно не и пречеше температурата и екстремната влажност на воздухот на терените на Флешинг Медоуз. Победата е уште поимпресивна ако се знае дека Остапенко ја елиминираше првата носителка и светска тенисерка број 1, Полјачката Ига Швјонтек во неделата.

Американката го освои првиот сет со 6:0 за само 20 минути, по што продолжи со одличната игра и во вториот дозволувајќи и само два гема во текот на целиот меч.

Гоф се обидува да стане првата американска шампионка во Њујорк од Слоун Стивенс во 2017 година, а во полуфиналето го чека подобриот од дуелот на 10. носителка, Каролина Мухова и Сорана Кирстеа.