Австриската министерка за Европа Каролина Едштадлер денеска изјави дека нејзината земја се залага за интеграција на земјите кандидати во Европската унија во фази, така што дури и пред формалното членство ќе им биде дозволено „да седнат на масата на ЕУ“ и да учествуваат во дијалогот, иако тие сè уште немаат право на глас.
Во интервју за австриското државно радио, Едштадлер рече дека сега е вистинско време за ваква промена во процесот на проширување на ЕУ.
Таа потсети дека таа и шефот на австриската дипломатија Александар Шаленберг и претходно искажувале таква идеја, но оценила дека сега е време да се спроведе.
„Живееме во многу предизвикувачко време, доживуваме војна на европско тло. Кога, ако не сега, е моментот да се реформира процесот на проширување на Унијата. Време е за големи идеи и да се разбере дека населението мора да биде дел од него“, рече Едштадлер.
Според неа, Западот со години ја следи европската интеграција на Западен Балкан, „каде заглавуваат многу работи“, а каде што сега „чекор по чекор има дури и отстапување“ од европскиот пат.
Целта на европската интеграција, нагласи таа, останува полноправно членство, но тоа е долг пат полн со „болни реформи“.
Не можеме да очекуваме тоа да се случи преку ноќ“, рече министерката, оценувајќи дека постепената интеграција ќе биде и награда за напорната работа што треба да ја направат земјите кандидати.
Постепената интеграција на земјите-кандидати, вклучително и Молдавија и Украина, ќе ги натера да се чувствуваат дека веќе учествуваат во креирањето на европската политика, иако сè уште немаат право на глас, рече Едштадлер.
Запрашанa како тоа може да изгледа во пракса, австрискиот министер рече дека преговорите со ЕУ се строго формален процес кој се одвива во кластери.
Кога една земја затвора кластер, на пример во областа на науката или образованието, треба да и се дозволи да учествува во дискусии на таа тема во ЕУ, објасни Едштадлер.
Таа рече дека, според нејзиното искуство, во 2020 и 2021 година, малкумина лидери на ЕУ навистина го поддржаа проширувањето, но дека денес тоа е „здраворазумска работа“ за повеќето поради зголеменото влијание на Русија и Кина.
