Трикратниот победник на УС Опен, Србинот Новак Ѓоковиќ по една година пауза се враќа во Њујорк и ќе атакува на 24. гренслем титула во кариерата. Познато е дека Американците не му дозволија на освојувачот на најмногу гренслем титули да учествува на турнирот бидејќи не беше вакциниран против коронавирусот. Сега правилата се сменија, а српскиот тенисер доби шанса повторно да се бори за трофејот во Њујорк.

Ѓоковиќ потврди дека е во одлична форма со освојувањето на Мастерсот во Синсинати и со победата во епското финале против Шпанецот Карлос Алкараз, кој ќе му биде најголемиот ривал и во Њујорк.

„Многу сум нервозен, како и сите. Луѓето мислат дека немам никаков стрес или напнатост, но всушност напротив, имам многу. Се справувам со него. Секој има свој начин да управува со тоа. Имав физички потешкотии во финалето во Синсинати, Карлос одигра брилијантно. Одигравме финале за паметење, беше возбудливо и дефинитивно е меѓу првите три најдобри меча во мојата кариера. Затоа паднав на теренот по мечот, се чувствував како да сум освоил гренслем. Се чувствував исцрпено неколку дена потоа, но имам сила и на 36 години“, изјави Ѓоковиќ.

Ѓоковиќ го избра познатиот хит на AC/DC, „Thunderstruck“, како песна која ќе го најавува неговото доаѓање бидејќи многу го мотивира.