– Нов извештај открива дека во 2022 година Италија ја доживеала најтоплата и најсушната година во својата историја, пренесува италијанската новинска агенција АНСА.

Во извештајот на Италијанскиот институт за заштита и истражување на животната средина (ISPRA) и Националниот систем за заштита на животната средина се вели дека просечната температура била за повеќе од еден степен Целзиусов повисока од 2021 година и за 0,58 Целзиусови степени повисока од претходниот рекорд.

Исто така, се додава дека температурата била за 1,23 степени повисока од просекот од 1991 до 2020 година.

Во извештајот, насловен „Климата на Италија во 2022 година“, се вели дека температурата била над просекот во секој месец од минатата година, освен во март и април.

Во документот, исто така, се забележува дека 2022 година била најмалку дождливата година од 1961 година, првата година за која се достапни целосни податоци. Врнежите биле 22 отсто помалку од просекот од 1991 до 2020 година.

Во периодот јануари-јули врнежите беа дури 39 отсто под нормалата.

„Аномалиите беа најизразени во северниот дел на земјата (-33%), потоа во централниот дел (-15%) и јужниот дел и островите (-13%), соопшти ИСПРА.

Продолжената суша што ја доживеа Италија минатата година и во поголемиот дел од првата половина на 2023 година предизвика огромни проблеми во земјоделството, особено на северот на земјата.

Научниците велат дека климатската криза предизвикана од човечките емисии на стакленички гасови прави екстремните временски настани, како топлотни бранови, суши, бури и поплави, да бидат почести и поинтензивни.