– Општина Пробиштип од утре воведува бесплатен линиски превоз, најави денеска градоначалникот на Општината, Драган Анастасов.

Тој за МИА вели дека бесплатен линиски превоз ќе има два дена во неделата, односно секој понеделник и среда. Општината за реализацијата на овој проект има издвоено 560.000 денари од сопствениот буџет, и овие средства се за да се реализира превозот до крајот на годината.

-Бесплатниот линиски превоз во Општина Пробиштип го воведуваме на барање на граѓаните, опфатени се 20 рурални места во нашата општина и е со цел да им се излезе во пресрет на повозрасната популација. Превозот ќе го користат сите, вели Анастасов.

Посочува дека овој проект општината го реализира врз основа на барање на месните заедници, со цел на поголема пристапност за граѓаните од овие населени места, да им се овозможи еднаков пристап до градот за извршување на своите потреби.

На социјалните мрежи и во населените места веќе е објавен и распоредот кога ќе поминуваат превозниците, но и кога ќе се враќаат од градот Пробиштип. Бесплатниот линиски превоз го реализираат лиценцирани локални превозници.