Американскиот претседател Џо Бајден во вторник во Белата куќа ќе се сретне со израелскиот претседател Исак Херцог. Двајцата ќе разговараат за регионалната интеграција на Израел и за воените врски на Русија со Иран, јавија светските агенции, повикувајќи се на изјава на портпаролката на Белата куќа, Карин Жан-Пјер.

„Бајден ќе ја нагласи важноста на нашите заеднички демократски вредности и ќе разговара за начините за постигнување еднакви мерки на слобода, просперитет и безбедност за Палестинците и Израелците“, се вели во соопштението.

Посетата на израелскиот претседател, чија улога е главно церемонијална, е во врска со одбележувањето на 75-годишнината од основањето на Израел во 1948 година. Херцог, исто така, е поканет да се обрати на заедничка седница на двата дома на американскиот Конгрес, кое е знак за посебна почит кон странски гостин.