По предлог на Министерството за земјоделство, шумарство и водостопанство, Владата на денешната седница ги усвои предложените мерки за поддршка на производителите на јачмен, пченица и ориз.
Како што информираат од Министерството овие мерки се подготвени во консултации со подсекторската група за жито.
-Со измени на Уредбата за директни плаќања креираме мерка, дополнителна субвенција, за остварено производство на јачмен во вредност од 12.000 денари по хектар, без скалесто субвенционирање. Мерка наменета за производителите на јачмен, кои оствариле минимален принос од 3.000 кг/ха и кои своето производство го имаат продадено кај регистрирани откупувачи, или складирано во регистрирани објекти, продадено на домашни фарми, или пак производството го искористиле во сопствените фарми во период до 31 август 2023 година, информираат од Министерството.
Pреку измените предавањето во складишни капацитети на производството од пченица и јачмен, наместо од 1 август, ќе почнува од 15-ти јуни и ќе трае до 1 септември 2023 година.
– Ваквата измена е со цел да ги опфатиме и оние земјоделци кои досега веќе го предале своето производство. Сите земјоделци кои ќе го предадат производството на складирање заклучно со 1 септември ќе можат да добијат финансиска поддршка за целиот период, додека количините се во складиштата, односно до крајот на годината. Преку измените кај оваа мерка се зголемува и финасиската поддршката која од 500.000 денари се згулемува на 1.500.000 денари по корисник, се наведува во соопштението.
Додаваат дека нова мерка за подршка е донесена и за проиводителите на ориз, менувајќи ја подмерката 1.2 од Уредбата за директни плаќања.
-Преку измените висината на дополнителни директни плаќања за ориз изнесува 12.000 денари по хектар без употреба на сертифициран семенски материјал, а 19.000 денари по хектар со употреба на сертифициран семенски материјал. Сите земјоделци кои имаат засеано површини со ориз, со сертифициран семенски материјал, доказите за набавка на истиот треба да ги достават до подрачните единици на МЗШВ, каде што имаат поднесено барање за финансиска поддршка, најдоцна до 14 јули, стои во соопштението.
