Десетици милиони луѓе во САД се изложени на ризик од лош квалитет на воздухот откако чадот од шумските пожари во Канада се пресели на југ. Во некои градови како Њујорк, небото ја промени бојата поради чадот.

Во сојузните држави Њујорк, Масачусетс и Конектикат се издадени предупредувања за квалитетот на воздухот, а властите ги повикуваат сите жители да го намалат времето на отворено.

Њујорк има најлош квалитет на воздухот. Небото стана портокалово-кафеаво во средата, училиштата ги откажаа активностите на отворено, а властите побараа од жителите да носат и маски доколку се надвор.

Градските минувачи носеа маски на лицето до таа мера што потсетуваше на најлошите денови од пандемијата на коронавирус. – Оние кои веќе имаат респираторни проблеми или проблеми со срцето и дишењето, како и децата и постарите, мора да бидат особено внимателни и треба да останат што повеќе внатре – изјави градоначалникот на Њујорк, Ерик Адамс. Милиони луѓе се изложени на ризик.