Претседателот на Нова српска демократија, Андрија Мандиќ изјави дека е голема опасност мешањето на странските амбасади во внатрешниот политички живот на Црна Гора.

– Тие странски амбасади имаат план да формираат коалиција на Европа сега заедно со подмладената ДПС. Тоа е нивната намера. И затоа нашата коалиција треба силно да се поддржи, за да не се реализира овој опасен проект, односно старите поразени сили да се вратат на задната врата и да продолжат таму каде што застанале, изјави Мандиќ на предизборната средба на коалицијата За иднината на Црна Гора (ЗБЦГ) во Будва.

Тој посочи дека нема да гледа дали парите на инвеститорот доаѓаат од САД, Германија или Кина и дека секој ќе биде корисен за граѓаните на Црна Гора, од која земја и да доаѓа.

Претседателот на Демократската народна партија и носител на листата на ЗБЦГ на парламентарните избори, Милан Кнежевиќ изјави дека претставниците на коалицијата имаат обврска да испратат порака до меѓународните претставници кои доаѓаат во Црна Гора дека граѓаните на таа земја одлучуваат кој ќе биде во Владата на Црна Гора.

Тој изјави дека ЗБЦГ ќе биде дел од владата и го повика Движењето Европа сега на Јаков Милатовиќ да не коалицира со ДПС, бидејќи тоа треба да биде со граѓаните кои ја покажале својата доверба.

Вонредните парламентарни избори во Црна Гора ќе се одржат на 11 јуни.