Врховната рада на Украина денеска соопшти дека од почетокот на руската инвазија досега загинале 501 дете, 961 е повредено, додека 401 се водат како исчезнати и ја повика меѓународната заедница да ги консолидира напорите за заштита и ослободување на украинските деца.

Во соопштението се цитираат податоци собрани од УНИЦЕФ, оценувајќи дека „околу 20 илјади деца биле насилно депортирани на територијата на Русија од привремено окупираните територии на Украина или територии кои биле под руска окупација“.

„Според достапните информации, повеќе од 1.000 украински деца се наоѓаат на територијата на Белорусија во рамките на одлуките на самопрогласениот претседател на Република Белорусија, како и поединечни одлуки на сојузната држава“, се вели во соопштението. .

Парламентот наведува дека злосторствата врз украинските деца се грубо кршење на Конвенцијата на Обединетите нации за правата на детето од 1989 година и дека Русија ги носи децата наводно на одмор и рехабилитација, но во реалноста насилно ги затвора, не дозволувајќи им да се вратат во нивните родители.

„Русија не дава списоци на депортирани деца и одбива да преговара за нивното враќање. Поради противењето на руската страна, од почетокот на сеопфатната вооружена агресија на Руската Федерација против Украина, вратени се само 361 дете“, се вели во соопштението.

Поради тоа, Врховната Рада на Украина ја повикува меѓународната заедница да донесе соодветни одлуки во врска со одлучната осуда на присилната депортација на украинските деца и да изрази јавна поддршка за активностите на Меѓународниот кривичен суд, особено во однос на истрагата и кривично гонење за злосторства и геноцид.

„Украинскиот Парламент ги повикува органите за спроведување на законот на другите земји да им помогнат на државните органи на Украина и на Меѓународниот кривичен суд во собирањето докази поврзани со вмешаноста на Русија и нејзините претставници во присилната депортација на украинските деца“, се вели во соопштението.

Парламентот, исто така, ја повика Владата на Украина да ги преземе сите можни мерки за да му обезбеди на комесарот за човекови права на Советот на Европа, на Високиот комесаријат за човекови права на Обединетите нации и на Комитетот на ОН за правата на детето комплетни списоци на депортирани деца од 2014 досега.