Словачката претседателка Зузана Чапутова денеска го назначи Лудовит Одор за вршител на должноста премиер, чија техничка влада ќе ја води земјата до предвремените избори во септември.

Назначувањето на 46-годишниот Одор доаѓа по распадот на централнодесничарската коалиција која владееше од последните избори во 2020 година.

Одор е познат како почитуван, политички независен економист кој досега ја извршуваше функцијата заменик-гувернер на Словачката централна банка.

Словачка со месеци се соочува со политичка нестабилност. Владејачката коалиција предводена од Едуард Хегер почна да се распаѓа по оставката на некои министри, а потоа и самиот Хегер поднесе оставка на 7 мај.

Претходно, оставки поднесоа поранешниот министер за земјоделство Самуел Влчан и поранешниот министер за надворешни работи Растислав Качер.

Влчан поднесе оставка откако се дозна дека неговата приватна компанија контроверзно добивала европски фондови додека тој сè уште бил на функцијата, а Качер затоа што Хегер во телевизиска изјава одбил да замине по избивањето на скандалот.

Одор студирал математика и менаџмент, а поголемиот дел од кариерата го поминал во јавниот сектор на позиции поврзани со економија.

Тој учествуваше во подготовките на земјата за пристапување во еврозоната во 2009 година и помогна во формирањето на аналитичкото одделение на Министерството за финансии и Државниот буџетски совет.

Тој помина четири години во администрацијата на централната банка, од 2006 до 2010 година, а во 2018 година се врати на местото заменик – гувернер.

Тој беше и советник на премиерот Михал Хорват во 2012 година, како главен економист на Словачката централна банка.