Продолжува неизвесноста околу покачувањето на платите на здравствените работници, а сѐ уште не е потпишан и анексот на колективниот договор, со кој треба да се реализира покачувањето, неизвесно е како ќе биде исплатена априлската плата, реагираа на денешната прес-конференција, Љубиша Каранфиловски, претседател на Синдикат за здравство, фармација и социјална заштита и Предраг Серафимовски, претседател на Синдикат на Клинички.

Синдикалните претставници појаснија дека она што го очекуваат вработените, е она што било договорено, покачена плата за април и со разлика на плата од претходниот месец.

– Здравството е осетлив и значаен систем, столб на државата, нагласија претставниците на синдикатите.

Каранфиловски потсети дека досега се направени два протеста и дека во моментов во здравството се случува таканаречен бел или тивок штрајк, кој значи демотивираност на вработените, кои сепак совесно даваат здравствена услуга на пациентите, но, им се губи ентузијазмот.

Според нивните последни информации, Министерството за здравство чекало писмено мислење од Фондот за здравствено осигурување и Министерството за финансии, за да пристапи кон потпишување, а како информација и заклучок за покачување, поминало на Влада. Беше изразена надеж дека нема да дојде до тоа, да мора да се преземе најрадикалниот чекор, генерален штрајк.