Турција планира да набавува дизел во рамките на контроверзниот договор меѓу Соединетите Американски Држави и Русија, најави денеска турскиот министер за енергетика Алпарслан Бајрактар, објави германскиот весник „Ханделсблат“.

Бајрактар во интервју за телевизијата „Канал 7“ изјави дека договорот меѓу САД и Русија е важен за енергетската безбедност на Турција.

„Со американскиот претседател Доналд Трамп е постигнат договор за дизел. Врз основа на нашите разговори, дел од тој дизел ќе го испорачаме во Турција“, изјави министерот, без да открие дополнителни детали за договорот.

Договорот наиде на остри критики од украинскиот претседател Володимир Зеленски и европски политичари, како и од поединечни членови на Републиканската партија на Трамп.

Турција планира значително зголемување на домашното производство на гас

Бајрактар најави и дека Турција планира значително да го зголеми домашното производство на природен гас.

Почетокот на работата на втората пловечка платформа за производство на гас се очекува во првиот квартал од 2028 година. Со тоа, дневното производство на гас во Црното Море би се зголемило на 45 милиони кубни метри.

„Тоа значи дека три од четири домаќинства во Турција ќе го користат нашиот гас“, порача министерот.

Турција вчера ја спушти во Црното Море својата прва пловечка платформа за производство на гас, наречена „Осман Гази“.

Со нејзиното активирање, дневното производство од најголемото домашно гасно наоѓалиште Сакарија треба да се зголеми повеќе од двојно, од сегашните 9,5 милиони на 20 милиони кубни метри.

Турција е еден од најголемите пазари на природен гас во Европа, а досега речиси целосно ги задоволуваше своите потреби преку увоз.

Минатата година земјата потрошила 59 милијарди кубни метри природен гас, додека домашното производство изнесувало само 3,1 милијарда кубни метри.

Одложени истражувањата за нафта и гас кај Пакистан

Турскиот министер за енергетика соопшти и дека планираните истражувања на јаглеводороди во близина на брегот на Пакистан се одложени за околу шест месеци.

Како причина за одложувањето го наведе влијанието на војната во Иран врз регионот.