Русија планира да издвои 17,1 билиони рубљи – или 202,58 милијарди долари – за одбраната во 2027 година. Според владините документи во кои увид имаше „Ројтерс“, ова е највисоката сума од почетокот на војната во Украина и претставува зголемување од околу 27 отсто во однос на првично планираните 13,5 билиони рубљи.
Документите што ги разгледа „Ројтерс“ укажуваат на тоа дека Кремљ нема намера да ги намали воените трошоци; напротив, планира да издвои рекордни суми за одбраната, и покрај растечкиот буџетски дефицит и опаѓањето на приходите од нафта и гас.
Администрацијата на Путин очигледно е подготвена да ги зголеми даноците, да го зголеми државното задолжување и да посегне по националните резерви за да ги финансира своите воени приоритети. Планираниот буџет сигнализира дека Москва смета на континуирано високи воени трошоци, наместо на брзо намалување на трошоците поврзани со војната.
Вкупните трошоци за одбрана во текот на следните три години треба да достигнат 50 билиони рубљи. Иако првично беа планирани 12,1 билион рубљи за 2026 година, реалните бројки за трошоците остануваат доверливи и нема да бидат обелоденети. Во документите исто така се наведува дека некои воени расходи може да бидат заведени под други буџетски ставки.
Истовремено, владата ја удвои прогнозата за буџетскиот дефицит за 2026 година, зголемувајќи ја од 1,6 отсто на 3,2 отсто од бруто-домашниот производ (БДП). Вкупните буџетски расходи во 2026 година ќе се зголемат за 13,2 отсто, достигнувајќи 48,6 билиони рубљи, што претставува 20,9 отсто од БДП.
Финансирање преку нови даноци и задолжување
Владата треба да го достави нацрт-буџетот до парламентот до 1 октомври. За да го финансира растечкиот дефицит, минатата недела таа најави планови за нови зголемувања на даноците во 2027 година. Документите покажуваат дека новиот данок на екстра-профит за металуршките и рударските компании би требало да донесе околу 200 милијарди рубљи годишно. Планот за нето-задолжување за 2026 година ќе се зголеми за 26 отсто, на 5 билиони рубљи, а за намалување на дефицитот ќе се искористат 459 милијарди рубљи од Фондот за национално богатство, што претставува околу 11 отсто од ликвидниот дел на фондот. Истовремено, проценката на приходите од нафта и гас за 2026 година е намалена од 8,9 на 7,6 билиони рубљи.
Според проекциите, државниот долг ќе порасне на 21,7 отсто од БДП во 2027 година, од 19,9 отсто во 2026 година. Ова ќе го надмине нивото од 20 отсто, кое властите го сметаат за безбедно. Вкупното задолжување во 2027 година ќе се зголеми за 43 отсто, на 7,7 билиони рубљи.
