Недостатокот на прифатливи станови е голем проблем во многу европски урбани центри, а некои градови развија различни модели за да им овозможат на жителите да најдат покрив над главата по попристапни цени, пишува „Дојче Веле“.

Виенскиот модел се смета за еден од најуспешните европски примери во борбата против високите цени на кириите, самите градски власти издаваат под кирија околу 220.000 станови, додека уште 200.000 се одржуваат како субвенционирани станови.

Околу 60 проценти од жителите на Виена живеат во вакви станови, што директно влијае на стабилизацијата на цените на слободниот пазар на недвижности.

Градови како Барселона и Лисабон, исто така, со години вложуваат големи напори за воспоставување на тој модел.

Ситуацијата станува многу потешка кога земјиштето и зградите веќе се во трајна приватна сопственост, па од 2014 година, Париз го користи правото на првенствено одбивање за да го зголеми уделот на социјалните станови во населбите каде што притисокот врз станарите е најголем.

Целта е да се достигне удел од 30 проценти до 2035 година.
Покрај тоа, француската престолнина и околните општини сè повеќе купуваат канцелариски згради за да ги претворат во станбен простор.

Во поширокиот регион на Париз има 61 ваков проект, кој вкупно би можел да обезбеди до 8.200 нови станови.

Во Прага се изградени околу 660 станови, кои се наменети исклучиво за вработени во јавниот сектор.

Инвеститорот е ќерка компанија на чешка банка која, благодарение на европските субвенции и долгорочната пресметка за 40 години, планира да ги одржува кириите на ниво кое е за 20 проценти пониско од пазарното, пренесува Танјуг.