За три дена, крајнодесничарската влада на Џорџа Мелони ќе стане најдолговечната влада во повоена Италија, рекорд кој сепак ги крие големите предизвици што ја очекуваат пред изборите следната година, објави денес агенцијата „Франс Прес“.
Во земја некогаш синоним за политичка нестабилност, првата жена премиер ќе ја води истата италијанска влада 1.413 дена, еден ден подолго отколку што Силвио Берлускони успеа во текот на неговите четири мандати.
„Тоа е секако извор на гордост“, изјави за АФП Марко Оснато, член на крајнодесничарската партија Браќа на Италија на Мелони.
„Кога станува збор за надворешна политика, Италија никогаш немала толку централна улога, особено во Европа“, рече Оснато, без разлика дали станува збор за заострување на правилата за имиграција или енергетска политика, при што Рим сега се смета за важен играч во Брисел.
Според аналитичарите, овој резултат треба дополнително да го зајакне имиџот на премиерката пред изборите во 2027 година. Италија имала речиси 70 влади во последните 80 години. Партијата Браќа на Италија постојано е на врвот на анкетите, но некои неодамнешни настани го комплицираа патот до реизбор, изјави Лоренцо Прељаско од институтот за анкети YouTrend за АФП.
Оваа година, Мелони беше ослабена од поразот на референдумот за судска реформа, кој им покажа на гласачите дека „може да има алтернативно мнозинство“ на владејачката ултраконзервативна коалиција, рече Прељаско. Неуспехот, исто така, покрена прашања за перформансите на владата.
Реформирањето на судството, заедно со зајакнувањето на овластувањата на премиерот и зголемувањето на регионалната автономија, беше една од трите клучни обврски што коалициската влада не успеа да ги исполни досега. Критичарите велат дека резултатите се далеку под очекувањата и во некои други области, а владата не успеа да се справи со структурните проблеми што ја отежнуваат Италија.
фото/Depositphotos
