Три лица се повредени во сообраќајна несреќа што вчераутро се случила на магистралниот пат Кичево–Гостивар, во близина на кичевското село Колари.

Од МВР информираат дека несреќата била пријавена на 13 август во 7:50 часот во ОВР Кичево, а во неа учествувале товарно возило „фиат“ со скопски регистарски ознаки, управувано од 56-годишниот Д.К. од Скопје, и патничко возило „ауди“ со кичевски регистарски ознаки, управувано од 46-годишната Л.К. од село Попоец, Кичевско.

Во несреќата, сопатникот Р.Г. (39) од село Другово се здобил со тешки телесни повреди. Возачката Л.К. и другиот сопатник, 74-годишниот Г.Г., исто така од село Другово, се здобиле со телесни повреди.

Повредите биле констатирани во Медицинскиот центар во Кичево.

За случајот бил известен јавен обвинител, а увид извршила увидна екипа од ОВР Кичево.