Европската фудбалска федерација (УЕФА) воведе две значајни промени во правилата за своите клупски натпреварувања. Веста се однесува на системот на суспензии поради жолти картони и прикажувањето на времето на семафорите на стадионите.

Нов праг за суспензии

Првата промена се однесува на акумулираните жолти картони. Според новото правило, играчот ќе добие суспензија од еден натпревар, откако ќе акумулира четири жолти картони. Ова им овозможува на играчите да играат повеќе натпревари пред да бидат принудени да одат на принудна пауза, поради јавни опомени.

Крај на ограничувањата на семафорите

Уште една иновација ќе биде видлива на стадионите, а тоа е правило кое со години ги збунуваше фудбалските фанови на трибините. УЕФА ја укина долгогодишната забрана за прикажување на времето по 45-таа и 90-та минута на официјалните семафори.

Отсега, часовникот на стадионот ќе може да го прикажува судиското надополнување на времето, следејќи ја практиката што веќе постои во некои национални лиги, како што е англиската.

Двете промени важат веднаш и важат за сите три клупски натпреварувања на УЕФА: Лигата на шампионите, Лигата на Европа и Конференциската лига.

Foto/ Depositphotos