Претседателот на САД, Доналд Трамп, јавно нападна еден од најголемите кошаркарски ѕвезди на сите времиња – Леброн Џејмс, изјавувајќи дека тој „можеби е расист“. Со оваа негова забелешка тој го засили судирот меѓу нив кој трае цела деценија.

Коментарот дојде откако Џејмс потпиша договор со Филаделфија Севентисиксерс, а Трамп повторно ја отвори вечната дебата за тоа кој е најголем кошаркар во историјата – Леброн или Мајкл Џордан.

„Мајкл Џордан ми е пријател. Мислам дека Леброн можеби е расист, а можеби едноставно не ме сака. Не знам точно, но јас ги сакам само луѓето кои ме сакаат мене. Затоа секогаш сум на страната на Џордан. Недавно играв голф со него, навистина е добар човек“, изјави Трамп.

Нетрпеливоста меѓу Трамп и четирикратниот НБА шампион започна уште во 2016 година, кога Леброн јавно ја поддржа Хилари Клинтон на изборите. Тој тогаш истакна дека на Америка ѝ е потребен „претседател кој ги обединува луѓето“.

По победата на Трамп, конфликтот се засили во 2017 година, кога тој ја повлече традиционалната покана за Голден Стејт Вориорс да ја посетат Белата куќа. Леброн реагираше жестоко на социјалните мрежи со порака: „Беднику, посетата на Белата куќа беше чест додека ти не се појави!“

Од тогаш, двајцата редовно разменуваат остри зборови. Трамп во една прилика напиша дека новинар успеал да направи Леброн да изгледа паметно, „што воопшто не е лесна задача“.

Џејмс, пак, остана активен во политичкиот живот, поддржувајќи ги демократите и остро критикувајќи го Трамп за неговиот однос кон афроамериканските спортисти кои протестираа против расната неправда. Во 2020 година го поддржа Џо Бајден, а пред изборите во 2024 година застана зад Камала Харис, споделувајќи видео со спорни изјави на Трамп и порака: „Кога размислувам за моите деца и нивното идно растење, изборот е повеќе од јасен.“

Леброн е само едно од звучните спортски имиња со кои Трамп влезе во јавни конфликти, а меѓу нив се и НБА ѕвездите Стефен Кари и Кевин Дурант.

Фото: Депозитфотос