Иранската државна телевизија соопшти дека началникот на Генералштабот на вооружените сили Али Абдолахи се сретнал со врховниот водач Моџтаба Хамнеи, кој не се појавува во јавноста од неговото именување во март.

Според извештајот, на состанокот биле издадени „нови директиви и насоки“ за продолжување на операциите насочени кон спротивставување на „непријателот“, без да се наведат детали за времето на средбата.

Моџтаба Хамнеи, кој според медиумските извештаи бил повреден во воздушни напади на почетокот на конфликтот на Блискиот Исток, од неговото именување досега се појавува само со писмени соопштенија.

Тој, според агенцијата Франс Прес, не одржал јавни настапи по преземањето на функцијата.

Портпаролот на иранската армија Мохамад Акраминиа изјави дека бродови од држави кои ги почитуваат американските санкции против Иран би можеле да се соочат со „тешкотии“ при преминување низ Ормутскиот теснец.

Паралелно, ирански пратеници најавија подготовка на закон со кој би се формализирал надзорот над теснецот и би се вовела забрана за премин на бродови од „непријателски држави“.