Министерот за одбрана на САД, Пит Хегсет, и генералот началници на Здружениот штаб на вооружените сили, Ден Кејн, одржаа прес-конференција во Пентагон за да упатат строго предупредување до раководството на Иран. Хегсет рече дека блокадата на иранските пристаништа и економскиот притисок ќе продолжат освен ако Техеран „не избере мудро“. Адмиралот Бред Купер, командант на Централната команда на САД задолжен за Блискиот Исток, исто така учествуваше на брифингот.
„Во меѓувреме, и колку што е потребно, ќе ја одржиме оваа успешна блокада. Но, ако Иран донесе лоша одлука, ќе се соочи со блокада и бомби што ќе паѓаат врз инфраструктурата, енергетските и електричните објекти“, рече Хегсет, додавајќи дека Министерството за финансии исто така „го зголемува економскиот притисок до максимум“.
„Ве повикувам да го изберете договорот што е на ваш дофат, за доброто на вашиот народ и целиот свет“, рече тој. Потоа, американскиот министер за одбрана ги отфрли иранските тврдења за контрола на Ормускиот теснец. Иако Иран сака „јавно“ да нагласува дека го контролира теснецот, Хегсет рече: „Не можете ништо да контролирате“.
Тој додаде дека „заканата од пукање“ врз трговски бродови „не е контрола, туку пиратство“. Хегсет, исто така, истакна дека САД го постигнуваат сето ова користејќи „помалку од 10 проценти од американската поморска моќ“. Тој, исто така, рече дека верува оти врховниот лидер на Иран, Моџтаба Хамнеи, е ранет, но жив.
„Морнарицата на САД го контролира сообраќајот што влегува и излегува од теснецот затоа што имаме вистински средства и реални капацитети. Ја спроведуваме оваа блокада со помалку од 10 проценти од американската поморска моќ.
Математиката е јасна. Ние користиме 10 проценти од најмоќната морнарица во светот, а вие имате нула проценти од вашата. Тоа е вистинска контрола“, рече Хегсет, кој го започна брифингот со директно предупредување до Иран: „Ве гледаме“.
Тој рече дека иранската војска мора „мудро да избере“, потсетувајќи го Техеран дека „нашите капацитети не се исти“. „Запомнете, ова не е фер борба и знаеме каква воена опрема преместувате и каде ја преместувате“, рече тој, додавајќи дека САД само стануваат посилни, додека Иран ги „ископува“ преостанатите лансери и ракети што повеќе не можат да ги заменат.
Пит Хегсет ги обвини американските медиуми дека „навиваат само за едната страна“ и произведуваат „бесконечен поток ѓубре“. Секретарот за одбрана рече дека и покрај „историскиот и важен успех“ на САД, медиумите упорно известуваат негативно. „Понекогаш е тешко да се знае на чија страна се некои од вас навистина“, рече тој.
Хегсет вети дека САД се „подготвени за акција“. Генералот Ден Кејн продолжи со изјавата дека американската војска е „подготвена да ги продолжи големите борбени операции практично во секој момент“.
