Цената на суровата нафта Брент го заврши тргувањето во петокот на 116,72 долари за барел, што претставува раст од 3,14 отсто, односно 3,55 долари. Американската сурова нафта WTI поскапе за 3,8 отсто, на 103,27 долари за барел, пренесува „Ројтерс“.

Нападите врз Саудиска Арабија ги зголемија цените

Растот на цените следуваше по нападите на јеменските Хути врз цели во Саудиска Арабија, меѓу кои и енергетска инфраструктура. Ова ја засили загриженоста за можни прекини во снабдувањето со нафта.

Дополнителна неизвесност предизвикаа и информациите за истекување на нафта во Обединетите Арапски Емирати, како и влошената безбедносна состојба на важните поморски рути за транспорт на енергенси.

Саудиската државна нафтена компанија „Арамко“ претходно нареди евакуација на своето седиште во Дахран, во близина на Бахреин, по интензивирањето на судирите.

Брент поскапе за шест отсто за една недела

Во текот на изминатата недела, цената на нафтата Брент порасна за шест отсто, додека американската нафта WTI поскапе за 2,3 отсто.

Цената на Брент го достигна највисокото ниво при затворањето на тргувањето од 29 април. Учесниците на пазарот продолжуваат внимателно да го следат развојот на конфликтот на Блискиот Исток и ризикот од нови нарушувања во производството и транспортот на нафта.