Шефот на Обединетите нации за човекови права, Волкер Турк, рече дека е „многу вознемирен“ од изјавите на високите израелски претставници кои ги повикуваат Палестинците да ја напуштат Газа.

„Многу сум вознемирен од изјавите на високите израелски функционери за плановите за префрлање цивили од Газа во трети земји’, напиша Турк на социјалната мрежа Х.

Тој додаде дека меѓународното право забранува присилно пренесување на заштитени лица во или депортација од окупираната територија, пренесува „Ал Арабија“.

Израелскиот министер за национална безбедност Итамар Бен-Гвир во понеделникот повика на промоција на „решенија за поттикнување на емиграцијата на Газанците“ и повторно воспоставување на израелски населби во Појасот Газа.

Еден ден претходно, екстремно десничарскиот израелски министер за финансии Безалел Смотрич, исто така, повика на враќање на доселениците во Газа, додавајќи дека Израел треба да охрабри околу 2,4 милиони Палестинци од енклавата да ја напуштат.

Израелската влада на премиерот Бенјамин Нетанјаху официјално не предложи планови за иселување на жителите на Газа или враќање на еврејските доселеници на територијата откако изби војната откако палестинската милитантна група Хамас го нападна јужен Израел на 7 октомври.

Повеќето жители на Газа беа принудени да ги напуштат своите домови поради борбите меѓу Израел и Хамас.

Шефот на европската дипломатија, Жозеп Борел, остро ги осуди, како што рече, запаливите и неодговорните изјави на израелските министри Гвир и Смотрич, во кои тие повикаа на преселување на Палестинците.

„Силно ги осудувам запаливите и неодговорните изјави на израелските министри Бен Гвир и Смотрич кои го навредуваат палестинското население во Газа и повикуваат на план за нивна емиграција“, напиша Борел на социјалната мрежа Икс (Твитер).

Борел додава дека присилното раселување е строго забрането како сериозно кршење на меѓународното хуманитарно право.