Австралиските власти денеска затворија неколку паркови во Сиднеј, откако на неколку локации во градот беше откриен азбест.

Градскиот совет на Сиднеј соопшти дека ќе започне со проверка на 33 паркови за да утврди дали се загадени со азбест и дека тестирањето ќе трае неколку недели.

Околу 700 ученици во јавното училиште во југозападен Сиднеј ќе бидат преместени неколку недели откако беше пронајден азбест во кампусот на училиштето, пренесува Ројтерс.

Почнаа инспекции во уште седум училишта, а наодите се очекуваат подоцна денеска, соопштија властите.

Парадата на ЛГБТ, „Марди Грас“ во Сиднеј, закажана за недела, која вообичаено привлекува десетици илјади луѓе, е откажана откако околу местото на одржување беа пронајдени траги од азбест.

Освен на една локација, типот на откриениот азбест е врзан азбест, кој претставува низок ризик за здравјето на луѓето и животната средина, соопшти Управата за заштита на животната средина (ЕПА), пренесува Танјуг.

Австралиската влада на Нов Јужен Велс формираше работна група за да обезбеди повеќе ресурси и персонал за поддршка на ЕПА.

Австралиската министерка за животна средина Пени Шарп рече дека тоа е најголемата еколошка криминална истрага во последните децении.

Азбестот првпат беше пронајден во јануари на игралиште во западниот дел на Сиднеј, подоцна откриен на неколку локации во близина на парк, а досега е пронајден на околу 20 локации во градот.

Азбестот се користи од крајот на 19 век за зајакнување на цементот и како огноотпорен материјал, но истражувањата покажаа дека азбестните влакна може да предизвика воспаление и рак на белите дробови.