Украинскиот претседател Володимир Зеленски престојува во Белград, каде што денеска ќе се сретне со српскиот претседател Александар Вучиќ. Двајцата лидери разговарале во неколку наврати во изминатите години, но ова е прва официјална посета на украински претседател на Србија по неколку години.

Зеленски вчера околу 18 часот пристигнал на белградскиот аеродром „Никола Тесла“, каде што го пречекала министерката за рударство и енергетика Дубравка Ѓедовиќ Хандановиќ.

По пристигнувањето, Зеленски порача дека Украина е „секогаш подготвена за конструктивна соработка“.

„Пристигнав во Србија со мојот тим. За денеска и утре се закажани важни разговори – со претседателот Александар Вучиќ и премиерот Ѓуро Мацут. Ќе разговараме за проширување на економските врски меѓу нашите земји, односите со Европската Унија, други области кои можат да им користат на нашите народи и за безбедносни прашања“, изјави Зеленски.

I arrived in Serbia with my team. Important talks are scheduled for today and tomorrow – with President Aleksandar Vučić and Prime Minister Đuro Macut. We will discuss expanding economic ties between our countries, relations with the European Union, other areas that can benefit… pic.twitter.com/97FE3H3RBx

— Volodymyr Zelenskyy / Володимир Зеленський (@ZelenskyyUa) August 7, 2026

Вучиќ синоќа приредил свечена вечера за украинскиот претседател.

Свечениот пречек пред Палатата „Србија“ е предвиден за 10:30 часот, по што ќе следува разговор меѓу Вучиќ и Зеленски, а потоа и состанок на делегациите на двете земји.

Во 12 часот е предвидено потпишување меморандум за соработка во областа на здравјето на животните и безбедноста на храната, а потоа двајцата претседатели ќе дадат изјави за медиумите.

Вучиќ претходно најави дека меѓу главните теми ќе бидат европскиот пат на Србија и Украина, билатералната економска соработка и енергетиката.

Тој нагласи и дека посетата на Зеленски нема да значи промена на досегашната политика на Србија кон санкциите против Русија.

„Србија ја утврди својата политика пред четири и пол, речиси пет години, ги изнесе своите ставови кои во претходниот период не ги менуваше и така ќе остане до натамошно“, рече Вучиќ.

Фото: Володимир Зеленски/ Икс