Грција ќе учествува во обуката на пилоти на украинските воздухопловни сили за авиони Ф-16, изјави во понеделникот украинскиот претседател Володимир Зеленски. Данска и Холандија во неделата објавија дека ќе ги испорачаат првите Ф-16 на Украина.

„Денес имаме важен резултат за воздухопловната коалиција. Грција ќе учествува во обуката на нашите пилоти за Ф-16. Благодарен сум за овој предлог“, рече Зеленски на заедничката прес-конференција со грчкиот премиер Киријакос Мицотакис во Атина.

Зеленски ги претстави деталите од програмата за обука. Официјални лица на 11-члената коалиција изјавија дека обуката на пилоти за Ф-16 ќе се одржи во Данска и Романија. Претходно во понеделникот, Зеленски пред толпата во Данска изјави дека ветените испораки на Ф-16 го убедиле дека Украина може да стави крај на руската инвазија.