Уапсени се уште тројца осомничени во врска со терористичкиот напад во петокот во Москва во кој загинаа 137 лица.

Браќата Аминчон и Диловар Исломов, како и нивниот татко Исроил Исломов, денеска се појавија пред судот во Басмани обвинети за помагање и поттикнување тероризам и беа осудени на истражен притвор во високобезбедносен објект до 22 мај.

Тие се обвинети дека биле дел од ќелијата на ИСИЛ која го изврши нападот и помогна во планирањето на бегството на вооружените лица кои отворија оган врз посетителите на концертот во Crocus City Hall во близина на Москва.

Диловар Исломов е претходниот сопственик на белиот автомобил Рено со црн покрив за кој властите тврдат дека било возило за бегство на напаѓачите на Crocus City Hall. Таткото и синовите се обвинети за заговор со еден од другите наводни напаѓачи, Шамсидин Фаридуни.

ТАСС јавува дека е уапсен и Киргистанецот Алишер Касимов, кој наводно им изнајмил стан на извршителите на терористичкиот напад. Касимов е роден во градот Ош. Тој е руски државјанин и има три деца. Тој е сопственик на кафуле во Красногорск, пишува ТАСС.