Околу 347 милиони деца во Јужна Азија страдаат од недостиг на вода, се вели во извештајот објавен денеска на УНИЦЕФ, организацијата за помош на децата на Обединетите Нации.
Повеќе од една четвртина од сите деца живеат во јужноазискиот регион, најнаселен во светот.
Според извештајот на УНИЦЕФ, 55 отсто од децата во Јужна Азија страдаат од недостаток на вода – највисока стапка во светот.
„Безбедната вода е основно човеково право, но милиони деца во Јужна Азија немаат доволно вода во регионот погоден од поплави, суши и други екстремни временски настани, сè повеќе предизвикани од климатските промени“, рече Санџај Вијесекера, регионален директор на УНИЦЕФ за Јужна Азија..
Пред конференцијата на ОН за климатски промени COP28 во Дубаи на крајот на месецот, УНИЦЕФ ја повикува меѓународната заедница да преземе чекори за да обезбеди децата да имаат планета на која вреди да се живее.
Во извештајот се наведува дека 594 милиони деца во светот сè уште немаат пристап до вода за пиење, основни санитарни и хигиенски услови, што ги прави особено ранливи на недостиг на вода и опасности, шокови и стресови предизвикани од климата.
Недостатокот на вода влијае на благосостојбата и растот на децата, создава несигурност, неухранетост и болести.
Недостигот на вода влијае и на земјоделството, индустријата и економскиот раст. И ако фармерите работат лошо, децата се со поголема веројатност да бидат принудени на детска работа, се вели во извештајот.
Минатата година во Јужна Азија, 45 милиони деца немаа пристап до вода за пиење – повеќе од кој било друг регион. Но, УНИЦЕФ рече дека пристапот до вода брзо се проширува и се надеваат дека тој број ќе се преполови до 2030 година.
