Светската здравствена организација (СЗО) денеска ги повика владите да ги третираат електричните цигари и испарувачите слично како и тутунските производи и да ги забранат сите видови вкусови, што би било удар за тутунската индустрија во нејзините напори да развие алтернатива на традиционалните цигари.
Застапниците на електронските цигари ги гледаат како клучна алатка за намалување на смртните случаи и болестите поврзани со пушењето. Сепак, СЗО смета дека се потребни итни мерки за нивна контрола.
Истражувањата покажаа дека нема доволно докази дека тие им помагаат на пушачите да се откажат од пушењето и дека се штетни за здравјето и можат да предизвикаат зависност од никотин кај непушачите, особено кај децата и младите.
Децата на возраст од 13 до 15 години користат електронски цигари повеќе од возрасните, а тоа е резултат на агресивен маркетинг и е случај во сите региони во светот, наведува СЗО.
„Децата можат да станат зависни од никотин“, рече генералниот директор на СЗО, Тедрос Аданом Гебрејесус, повикувајќи ги земјите да спроведат строги мерки.
СЗО повика на промени, вклучително и забрана на сите ароми како што е ментолот и примена на мерки за контрола на тутунските производи за испарувачите. Ова вклучува високи даноци и забрана за користење на јавни места.
СЗО нема овластување над националните регулативи и може да обезбеди само упатства, но нејзините препораки често се прифаќаат доброволно.
СЗО и некои други антитутунски организации се залагаат за построги регулативи за поновите никотински производи, насочени кон алтернативните опции на кои некои тутунски гиганти како Филип Морис Интернешнл и Бритиш Американ Тобако ги засноваат своите идни стратегии.
Големите тутунски компании се надеваат дека ќе создадат нови приливи од алтернативни производи, бидејќи построгите регулативи и намалените стапки на пушење вршат притисок врз нивните традиционални бизниси на некои пазари. СЗО верува дека некои супстанци од испарувањето за кои е познато дека предизвикуваат рак претставуваат ризик за здравјето на срцето и белите дробови, а исто така може да му наштетат на развојот на мозокот кај младите луѓе.
