Министрите за надворешни работи на членките на НАТО отвораат дводневен состанок во седиштето на Алијансата во Брисел, посветен пред се на продолжување на поддршката за Украина да се брани од руската инвазија.

Украинскиот министер за надворешни работи Андриј Сибиха треба да ги извести своите колеги во НАТО за моменталната ситуација на фронтот, во време кога источниот фронт на Украина е под зголемен притисок од руските напади.

Се очекува Украина повторно да аплицира за приклучување кон западната воена алијанса, откако претседателот Володимир Зеленски објави дека неговата земја може да се согласи на прекин на огнот со Русија доколку НАТО заштити делови од земјата под украинска контрола.

„Ако сакаме да ја запреме оваа вжештена фаза од војната, мора да ја ставиме под чадорот на НАТО територијата на Украина која е под наша контрола“, изјави Зеленски за британски Скај њуз.

Засега, алијансата одбива да и понуди членство на Украина поради страв дека руската инвазија би можела да ескалира во војна во која е вклучен и НАТО.

Министрите ќе разговараат и за потегот на Русија, која минатиот месец лансираше експериментална балистичка ракета кон Украина и ќе ги разгледаат потребите на Киев од противвоздушни системи.