Романија не е подготвена за потенцијална војна со Русија и мора да се подготви, изјави началникот на Генералштабот на романската армија, Георгита Влад.
„Да, населението на Романија, како и целото население на Европската унија, Европа, мора да биде загрижено“, рече тој во интервјуто за Радио Слободна Европа објавено вчера.
„Ако Русија победи во Украина, главната цел ќе биде Република Молдавија. Ќе бидеме сведоци на тензии на Западен Балкан. Повеќе од убеден сум дека политиката на претседателот Путин ќе ескалира во блиска иднина“, додаде началникот на армијата, пренесува Политико.
Тој се залагаше за доброволна основна воена обука за мажи и жени до 35-годишна возраст. Тој смета дека укинувањето на задолжителниот воен рок во Романија е клучната причина за лошата подготвеност на армијата. Тој, исто така, повика на правни реформи за зајакнување на одбраната на Романија од руските беспилотни летала.
Остатоци од еден од беспилотните летала на Кремљ паднаа во Романија во септември минатата година, а леталото не можеше да биде соборено бидејќи романскиот закон не го дозволува тоа, истакна генералот. Неговиот говор дојде откако голем број други западни воени и одбранбени водачи, вклучително и началникот на британската армија, генерал Патрик Сандерс, предупредија на потенцијална војна со Русија.
Минатата недела Сандерс ги повика британските власти да ја „мобилизираат нацијата“ за да се подготват за можна војна со Русија. Да потсетиме, Москва речиси две години води сеопфатна војна против Украина. Претходно германскиот министер за одбрана Борис Писториус изјави дека рускиот напад врз НАТО е „можен“ за „пет до осум години“.
Холандскиот адмирал Роб Бауер, висок функционер на НАТО, рече дека воениот блок се соочува со „најопасниот свет во последните децении“. Москва ги омаловажува западните обвинувања. Рускиот министер за надворешни работи Сергеј Лавров изјави дека проценките дека Русија нема да застане на Украина се „апсурдни“.
„Руската Федерација стана проблем за светскиот поредок, за демократијата. Всушност, тоа е војна на Русија со демократскиот свет. Ова не е војна со Украина“, заклучи Влад.
