Претседателот на Европскиот совет Шарл Мишел денеска изјави дека се откажува од својот план да се кандидира за функцијата пратеник во Европскиот парламент.

„Нема да бидам кандидат на европските избори. Сите мои напори ќе ги посветам на моите сегашни обврски додека не завршат“, напиша Мишел на Фејсбук.

Одлуката на Мишел претходно овој месец да се кандидира на изборите во јуни како кандидат за белгиската либерална партија наиде на критики, делумно затоа што тој ќе мора предвреме да ја напушти сегашната функција.

Неговата кандидатура, исто така, покрена прашања за евентуален судир на интереси, бидејќи тој ќе се кандидира како партиски политичар во изборната кампања во исто време како вршител на должноста претседател на совет составен од водачи од различни политички групи.

„Секогаш ќе бидам застапник за Европа која е демократска, силна, обединета и господар на сопствената судбина. На крајот од овој мандат, ќе размислувам за природата и насоката на моите идни обврски“, додаде тој.