Рускиот претседател Владимир Путин изрази подготвеност наскоро да ја посети Северна Кореја, објави денеска севернокорејската државна новинска агенција КЦНА. Агенцијата објави подготвеност на севернокорејската влада „искрено да го поздрави најблискиот пријател на корејскиот народ“.

Претходно оваа недела, портпаролот на Кремљ, Дмитриј Песков, изјави дека Москва се надева дека посетата ќе биде договорена и дека Путин ќе отпатува во Северна Кореја „во догледна иднина“. На продлабочувањето на врските меѓу Москва и Пјонгјанг во странство се гледа со сомнеж и загриженост.

Се верува дека Северна Кореја ја снабдувала Русија со муниција и балистички ракети кои биле користени во инвазијата на Украина. Затоа, постојат стравувања дека Русија би можела да обезбеди техничка помош за програмите за оружје на Северна Кореја.

Претходно оваа недела, Русија ја потврди својата блиска соработка со Северна Кореја за време на тридневната посета на Москва на министерот за надворешни работи Чое Сон Хуи.

Како симбол на поблиска соработка, севернокорејскиот лидер Ким Џонг Ун го посети рускиот Далечен Исток минатиот септември и таму се сретна со Путин. Потоа следеше посетата на министерот за надворешни работи Сергеј Лавров на Пјонгјанг.