Поради обилните дождови што ги донесе тајфунот Хаикуи, кој сега е на јачина на тропска бура, јужна Кина е поплавена веќе седми ден, а многу жители и патишта се блокирани.

Во руралниот округ Бобаи во регионот Гуангкси, вчера спасувачите на чамци се обидуваа да ги евакуираат луѓето на безбедно од вода длабока повеќе од два метри, објавија денеска државните медиуми.

Во планинските региони на тој округ, лизгањето на земјиштето уништи патишта и урна мостови, објави Ројтерс. Во метеоролошката станица во Бобаи беше соборен локален рекорд кога количината на врнежи достигна 511,2 милиметри на метар квадратен, што е повеќе од четвртина од годишните врнежи во регионот.

Хаикуи ослабе од тајфун во тропска бура на 5 септември кога ја погоди кинеската провинција Фуџијан, но продолжи да носи обилни врнежи во јужна Кина, при што градот Шенжен беше погоден од најсилните дождови од почетокот на евиденцијата во 1952 година.

Хонг Конг го зафати најсилното невреме во последните 140 години. Метеоролозите најавија дека обилните врнежи ќе продолжат да паѓаат во Гуангкси во следните неколку дена.