Коалицијата предводена од Саудиска Арабија денеска соопшти дека пресретнала и уништила балистички ракети и беспилотни летала лансирани од Хутите кон два региони во Саудиска Арабија, во момент кога конфликтот меѓу Кралството и групата поврзана со Иран се интензивира.

Хутите лансирале три балистички ракети кон Источната провинција на Саудиска Арабија и четири беспилотни летала кон јужниот регион, наведе коалицијата.

Саудиската цивилна одбрана претходно издаде предупредување за можна непријателска закана во Источната провинција и во покраината Карџ, а подоцна соопшти дека опасноста во двете области е помината.

Ескалацијата отвори нов фронт во конфликтот на САД и Израел против Иран.

Саудиска Арабија ги засили нападите врз Хутите откако оваа група минатиот месец зазеде стратешки области долж јеменскиот брег на Црвеното Море и напредуваше кон теснецот Баб ел-Мандеб – витална глобална поморска рута за извоз на нафта од земјите од Персискиот Залив.

Овој теснец се наоѓа на спротивната страна на Арапскиот Полуостров во однос на Ормускиот теснец. Обновените борби меѓу двете страни го прекинаа примирјето од 2022 година, постигнато со посредство на Обединетите нации, кое во голема мера ги запре непријателствата меѓу коалицијата предводена од Саудиска Арабија – која ја поддржува меѓународно признатата влада на Јемен – и Хутите, кои го контролираат главниот град Сана. Ескалацијата, исто така, отвори нов фронт во војната на САД и Израел против Иран, забележа Ројтерс.