Бројот на загинати во силниот земјотрес што ја погоди Јапонија утринава се искачи на 64, а властите се обидуваат да им помогнат на преживеаните поради ниските температури и обилните врнежи кои се очекуваат во текот на денот.

Земјотрес со јачина од 7,6 степени според Рихтеровата скала го погоди полуостровот Ното во понеделникот попладне, уривајќи куќи и отсекувајќи ги оддалечените области од многу потребната помош.

За денеска се предвидуваат обилни врнежи во областите погодени од земјотресот, што ги зголемува стравувањата од лизгање на земјиштето и можат дополнително да ги попречат напорите за спасување на многуте луѓе затрупани под урнатините.

Властите вчера се бореа со пожарите во неколку градови и извлекуваа луѓе од урнатите згради. Според јапонската метеоролошка агенција, од првиот земјотрес во понеделникот се регистрирани уште 200 последователни потреси. Агенцијата предупреди дека во наредните денови може да има уште посилни земјотреси.