Албанскиот премиер Еди Рама изјави дека ситуацијата во Албанија не може да се спореди со настаните во Србија, каде што масовното студентско движење доведе до политички промени. Во исто време, албанската полиција почна да применува нови закони против демонстрантите, а за само неколку дена 83 лица кои учествуваа во антивладините протести во Тирана беа казнети.
Рама повтори на социјалните мрежи дека е подготвен да разговара со сите што веруваат во дијалог и наоѓање решенија преку комуникација, во секое време и на секое место, објавува „Јуроњуз Албанија“. Сепак, демонстрантите досега ги одбиваа неговите покани за разговори.
Зборувајќи на заедничка прес-конференција со амбасадорката на Европската Унија во Албанија, Софија Мореира де Соуза, Рама ги отфрли споредбите на протестите во Албанија со студентското движење во Србија, што доведоа до пад на владата на Александар Вучиќ.
Според него, ова се две сосема различни ситуации, а обидите за нивно поврзување се дел од политичка агенда чија цел е насилно соборување на албанската влада.
„Можете да утврдите колку е слична Албанија со Србија и колку е слична ситуацијата во Србија со ситуацијата во Албанија со споредување на ставот на ЕУ кон промените во Србија и големите промени што Албанија ги постигна оваа година“, рече Рама, пренесува „Јуроњуз Албанија“.
Додека Рама ги отфрла споредбите со Србија, протестите во Албанија траат повеќе од пет месеци, а властите почнаа да спроведуваат нов закон со кој се заоструваат казните за оние што учествуваат во демонстрациите.
Како што објави Балканската истражувачка мрежа (БИРН), полицијата објави дека вкупно 83 демонстранти, вклучувајќи 31 лице, биле казнети во текот на неколку дена по протестите одржани во средата навечер, пренесуваат медиумите во регионот.
Според полицијата, демонстрантите биле казнети за блокирање на сообраќајот и попречување на движењето на возилата, и покрај повторените предупредувања од полицајците. Секој од нив бил осуден на парична казна од 5.000 албански леки, или околу 55 евра.
Новиот закон, кој стапи на сила на 28 октомври, беше презентиран од Рама како пакет мерки против насилството и „урбаната анархија“.
Активистите, сепак, тврдат дека властите ги користат новите прописи за заплашување на граѓаните.
Фотографката и активистка Меј Сева изјави за БИРН дека била казнета откако учествувала во мирен протест пред седиштето на владата, каде што граѓаните се собираат повеќе од 150 дена.
„Оваа тактика на заплашување е очаен обид на владата да остане на власт и покрај речиси петмесечните протести со кои се бара нејзина оставка“, рече Сева.
Петнаесет граѓански организации го повикаа парламентот да го запре спроведувањето на новите прописи, предупредувајќи дека тие претставуваат неоправдано ограничување на уставните права и слободи.
Организациите нагласија дека насилството мора да се осуди и истражи, но дека постапките на поединци не смеат да бидат изговор за казнување на сите демонстранти.
