Рускиот претседател Владимир Путин денес изјави дека придонесот на секој Русин кон заедничката победа е важен, како и дека Русија во моментов се бори за сегашноста и иднината.

„За успешен и самоуверен развој на земјата, неопходен е придонесот на сите, волонтери, вработени во невладини организации и социјални служби, менаџери, инженери, работници и, секако, претприемачи“, рече Путин на форумот „Силни идеи за ново време“ во Нижни Новгород, во централниот дел на Русија, пренесува РИА Новости.

Путин рече дека Русија во моментов се бори за сегашноста и иднината и повика искуството на војниците стекнато за време на Втората светска војна да се земе предвид при развивање на воени, цивилни и сродни технологии.

„Во интерес на зајакнување на суверенитетот, се бориме за сегашноста и иднината на Русија преку нашите практични напори насочени кон подобрување на благосостојбата на нашите граѓани. Русија е силна и ќе остане силна и во иднина. Должност на државата и општеството е да обезбедат секој ветеран од специјална воена операција да може да продолжи да ѝ служи на татковината, но во економската, административната и социјалната сфера“, нагласи Путин.