Полјаците почнаа да излегуваат на гласање на парламентарните избори во Полска за 460 места во Сејм или долен дом и 100 места во Сенатот или Горниот дом, во кои се очекува релативен победник да биде владејачката ПиС.

Објавувањето на излезните анкети се очекува по затворањето на гласачките места во 21 часот. Пред изборите, анкетите покажаа дека национал-конзервативната партија на власт, Право и Правда (ПиС), најверојатно ќе остане најмоќната сила, но нема да може да освои апсолутно мнозинство.

На премиерот Матеуш Моравјецки тогаш ќе му треба поддршка од ултрадесничарскиот сојуз за да формира влада. Екстремно десничарската Конфедерација отфрли можна коалиција со ПиС уште во кампањата пред гласањето. Конфедерацијата сака целосна забрана на абортусот и на нејзините претставници не им се далечни антисемитските теории на заговор.

Либерално-конзервативната Граѓанска коалиција (КО), предводена од поранешниот премиер и поранешен претседател на Европскиот совет Доналд Туск, се очекува да биде на второто место, веднаш зад ПиС, според анкетата. Граѓанската коалиција би можела да формира коалиција со левичарскиот сојуз Левича и христијанскиот конзервативен Трет пат.

ПиС е на власт од 2015 година. Нејзината популарност доби удар поради високата инфлација. Цените на горивата во земјата драстично паднаа во последните недели, бидејќи државната компанија Орлен одеднаш почна да продава бензин и дизел многу под пазарните цени, што опозицијата го нарече изборен трик.

Католичката црква во Полска го слави 15 октомври како Ден на папата во спомен на Јован Павле Втори. ПиС се надева дека ова ќе ги донесе конзервативните гласачи кои одат во црква на гласање.